這是隻「追火箭股」
2020年08月10日04:00

甚麼是「追火箭股」?即是,本來無聲無息,怎知一個消息,即時由平地火箭式升空。

我智豬講邊隻股?正是過去兩個月狂升五倍的恒大健康(708)。

單單公布一個將研發新能源車概念,投資者即蜂擁入市,興奮地狂炒而上。一時間,竟然市值巴閉過中國電動車始祖比亞迪(1211)、豪華車霸主吉利汽車(175),甚至,其母企中國恒大(333)?

小弟睇,似乎「戲劇性」濃了少少!

恒大主席許家印,素來對「造勢」有能人所不能的功力,尤其精於小錢變大錢,變呀變,變到今天,已成《2020全球房地產富豪榜》第一位,壓倒香港首富李嘉誠。事實,佢亦精於高息發債集資,善用OPM(Other People’s Money )完成多個超級項目。小弟有位富豪老友乃老許忠實擁躉,單單賺恒大債券息都賺到笑呵呵(若六月有上「恒大健康車」者也應如是!)。可惜,我輩散戶,只得個睇字,今次恒大再次造勢成功,食住全球電動車研發及變主流大趨勢,再加一個「中國Tesla夢」,先宣布恒大健康將改名恒大汽車,然後,一次過在香港、上海及廣州狂谷廣告,發布「恒馳」快推出六款「靚仔」新能源車。睇圖片,設計的確幾有型,擺明走高檔路綫。

恒大揚言力爭三至五年內,成為世界規模最大,實力最強的新能源汽車集團。真的有雷霆萬鈞的感覺!究竟,其「底氣」,其「基礎」有幾大呢?

身邊老友又問我點睇?追唔追入多少恒大健康?

小弟睇法,如今連實物都未見就炒高成咁,少少違反常理,應該等研發品真正落地,確確實實向全世界示範有幾多過人之處時,再入股都未遲!

去年,強如Tesla都試過無端端自焚及電池爆炸。Tesla乃當今電動車霸王集團,都要有排搞才真正上到軌道,咁,「恒馳」若要一出就彈離先驅集團,應該要有不少秘密武器未曝光才成!

總結,「火箭股」今天才追已失時機,等等先!

國策透視/投資王

關注我們Facebook專頁
    相關新聞
      更多瀏覽