食肆定位決成敗
2020年01月20日03:01

香港飲食業永遠蓬勃,因大部分人皆有出外覓食習慣。人人食食食,自然食到嘴尖,個個識分性價比。所以,任何日子,永遠有食肆做都冇停手,亦有不少拍烏蠅,最後執笠收場。

我家附近的何文田廣場,兩年前大裝修後,引入不少非連鎖集團食肆。開始時,間間野心及朝氣皆勃勃,幕後人當然信心十足。不過,小弟一睇,見到兩間,全面唔睇好。

第一間為日本料理,專攻廚師發板(Omakase),晚餐要價近900起跳,加埋清酒,當然要過千。

另一間,走意大利中高檔快餐店路 ,一個早餐(磨菇或三文魚三文治加飲品),叫價60多至80元。

「落水」前宜多觀察

以上兩食肆投資者,必定是估計何文田佛光街及常盛街有千計新單位落成,間間值千萬或以上,必定有大量使得起錢中產湧入,需找大快活、翠河、麥當勞、吉野家 之外的高消費選擇。

搞錯晒!領展商場日常閒逛的,多屬公屋街坊, 十個冇一個有能力幫襯日本料理!附近的中產人士,畀得起1000元一餐,又會否選擇在屋 商場食刺身呢?

結果顯示,定位失敗,最快收檔。

意大利餐廳又如何,早餐咁貴,當然拍烏蠅,幸而轉身快,立即調低價錢,午餐只收68元至88元 ,如此級數,如此價錢,立即有市場。最重要,此店咖啡「好得」,遠勝所有快餐集團,所以,各類即沖靚咖啡可以收到25元至43元,仍有大量附近公開大學及房署總部工作人員捧場。晚餐方面,高質素的意式薄餅(薄酥皮)及意粉也出色,變成冇直接競爭對手,順利定位成功,熟客日比人多。

屋 商場兵家必爭之地為賣早餐,流水作業三個多鐘,密食當三番。

最近,何文田商場一間「百悅亭」排眾而出,旺爆,因推出盅頭鹹魚肉餅及鳳爪排骨飯,只賣18元 ,另加3元 ,可多杯飲品。定位擺明殺盡屋村草根居民及低消費打工階層。立時一擊即中,豬籠入水!

香港不少人喜歡投資飲食業,「落水」前宜多觀察,切忌一廂情願!

(智豬在握)

經濟觀察/投資王

關注我們Facebook專頁
    相關新聞
      更多瀏覽