【2019香港小姐】首輪面試5個高質候選靚女IG大起底 蔡嘉欣做過ViuTV主持 國際小姐湯洛晴勁有料!
2019年06月24日21:20

2019香港小姐選舉暑假就會進行,比起正式比賽,每年首輪面試可以話更有娛樂性!事關大台一出手,鹹魚白菜山珍海味以至豬扒牛扒樣樣有齊。今年質素雖然平均都係普普通通,仲有啲「翻版池美麗」混入其中,但當中都有幾個特別搶眼,甚至仲熟口熟面添!

撰文:AuntieSam|圖片:東星、Instagram、Facebook、節目截圖

2019香港小姐首輪面試5個高質候選靚女IG大起底

|2018國際小姐香港代表 Carmaney 湯洛晴

今年25歲嘅Carmaney原名為黃嘉雯,改左個藝名叫湯洛晴,同湯洛雯只係差一個字!呢位「小靚湯」2013年開始做model,拍過唔少廣告,仲代表過香港去東京參加2018國際小姐,如果入圍相信有望成為大熱!

除咗來頭唔細,身材亦係一啲都唔惹小!喺佢IG上面都有唔少泳裝低胸相,身材非常凹凸有致。個樣一開始望落,有幾分似宋熙年MIX朱千雪,再望多兩眼,又有啲似《都市閒情》主持劉彩玉嘅後生版,大家又覺唔覺?

|靚女Youtuber Kayan.C 蔡嘉欣

如果有睇開YouTube,對Kayan C蔡嘉欣相信唔會陌生!理大紡織及製衣系畢業,現時年僅25歲,就已經係時裝店兼美甲店老闆。未踏入電視圈之前,本身就已經係一個頗有名氣嘅KOL,多數分享一啲遊記同旅遊資訊,IG、YouTube都分別有超過10萬followers。

View this post on Instagram

晚安🌙

A post shared by kayan.c (@kayan.c) on Aug 30, 2018 at 8:32am PDT

2017年,佢就去咗ViuTV做清談節目《Trip精》嘅主持,之後亦有參與拍攝旅遊節目《返鄉下》,今次就過檔大台參選港姐。平時喺IG,可以見到佢好多去世界各地旅行嘅靚相,而名花有主嘅佢,仲不時會放下閃添!

|三地混血兒 Mercedes Pair 彭美詩

外表鬼鬼地嘅Mercedes Pair,其實係菲律賓、台灣同德國混血兒,喺香港土生土長,講得一口流利廣東話。佢任職模特兒,曾經多次去外地參加選美,年頭仲獲得過Miss World Noble Queen International 2018(2018 世界華貴小姐 )冠軍,成為首位獲得國際性選美賽事嘅香港人。

相信Mercedes視選美為集郵,而今年港姐就係佢嘅目標。都啱嘅,世界各地嘅選美比賽參加得多,本土嘅名銜就一個都冇,咁又點得呢?不過佢自己就曾經講過,畀好多香港人笑佢又肥又黑,搞到曾經一度失去自信。睇返佢IG啲相,其實都好索下!唔知又入唔入到港姐嘅評審眼中呢?

|九頭身美少女 Katy Yeung

走清純路線嘅Katy Yeung今年23歲,喺城大主修犯罪學。身高178cm,望落去有幾分似韓國女星,長手長腳可以話係佢最大嘅賣點。

雖然冇大家最鍾意嘅波濤洶湧,但修長嘅身形依然非常吸睛,最緊要係望落去有港姐氣質,唔少人都睇好佢入圍!

|42公斤翻版昆凌 Blossom陳熙蕊

九頭身美少女之後,最後要介紹嘅係只有42公斤、被傳媒封為「翻版昆凌」Blossom。睇落的的骰骰但原來都有163cm高,有一張一見難忘嘅V煞面,連講嘢個tone都好girlish,感覺非常gfable!咁當然咁嘅女仔有男朋友都好正常,一開佢IG就見到同男友嘅嘴嘴相,似乎兩個人都非常sweet下!

Blossom之前都有參選過2017年澳洲華裔小姐(布里斯班賽區),可惜就冇得獎。而平時鍾意唱歌嘅佢,更參選過《中國好聲音》2019澳大利亞海選(布里斯班區選拔賽),最後獲得賽區第4名同最具潛質獎。至於佢歌喉係咪真係咁好呢?其實佢喺IG都有post過《有一種悲傷》嘅錄音,大家可以自己去聽下喇……

延伸閱讀:

《切爾諾貝爾:傷心的兒童》(Chernobyl)成IMDb史上最高分劇集!主編Craig Mazin第二季將會…….

《白色強人》向經典電影《癲佬正傳》致敬 方紹聰演精神病人直闖幼稚園

關注我們Facebook專頁
    相關新聞
      更多瀏覽