【年度食材冠軍雞翼】葵廣雞翼節周末開鑼!20多款激新口味限時登場
2019年04月25日17:56

早前《新假期》舉行的年度食材選舉, 由香港人一人一票選出最愛食材,最後由雞翼勝出!這兩個周末,《新假期》更在葵涌廣場舉行《新假期》葵廣雞翼節,大家萬萬不可錯過。 18間葵廣小店,各自拎出看家本領,推出全新的雞翼小食或優惠。再講一次,雞翼節只限5日,絕不加場!唔想蘇州過後,一齊睇吓必食雞翼攻略!

撰文:胡蚊 | 攝影:Dicky

延伸閱讀:

深水埗蘇媽 ﹒蘇媽荃灣開分店!招牌肉骨茶任飲+咖央多士配拉茶|出街搵食

最平$7/對 淘寶耳環款式百搭超多好評!編輯推介 5間高質耳環專門店

雞翼高票勝出!年度「我最喜愛食材選舉2019」冠軍

《 新假期 》早前舉辦了年度「 我最喜愛食材選舉2019 」,希望更了解香港人口味,當中有10款搜尋率最高的話題食材,供讀者投票,歷時2個月的投票,冠軍食材終於誕生,由雞翼以31,816當選,成為港人2019年度食材冠軍!

《 新假期 》葵廣雞翼節4月27日本周六開始!

《 新假期 》葵廣雞翼節由4月27日開始,每逢周末舉行,一共有18間葵廣小店推出超過20款雞翼,現在為大家介紹各款雞翼,大家到場時就能夠鎖定目標,一擊即中!

20多款激新口味限時登場!

小心菊花組:

1.最巴辣!太太口服翼

個名咁搞笑,原來間舖仲搞笑。靈感來自早前網上 勁hit的職安真漢子主題小食店,全店都好「工程 feel 」,最好笑連店員都穿上地盤反光衣,剛陽味濃。老闆改名一向有心得:猛男響鈴鈴、扮晒蟹柳 ……今次「 太太口服翼 」 亦不負眾望,雞翼先飛水,印乾醃好,再以辣椒湯底灼熟。雞翼上 下都分別𠝹了幾刀,方便辣味滲入,吃時可自選6款辣度。圖中只 是小辣程度,估計魔鬼辣應是鋪滿辣粉。辣到飛起要急救,可以飲 罐自家品牌的手工啤酒,有「 麻椒橘香 」和「 烏梅琥珀 」兩款口味,每罐 $48,送雞翼一流。

$14/2隻

供應店舖:麻辣真漢子(3樓Top世界3069號T7舖)

營業時間:1pm-9pm(星期二休息)

2.最不適合人類!十八層地獄辣雞翼

$43/5件

賣開炸物的烤焗工房,為了這隻地獄雞翼,特地重新研發醃翼秘方,加入五、六款醃料,令雞翼外皮更香脆。平平無奇的炸翼,蘸上從美國訂回來,辣椒素指標高達1百萬SHU(指天椒約3萬SHU)的「死神級」Blair’s Ultra Death辣椒醬,馬上變得「生人勿近」。老闆話,吃一小口,已經有來回地獄又折返人間的感覺,故取名「十八層地獄辣雞翼」,自問好辣敢死隊,就記得試一試﹗

「死神級」Blair’s Ultra Death辣椒醬

供應店舖:烤焗工房(3樓Top世界3069-T11-T12號舖)

營業時間:12nn-9:30pm

3.勁辣雞翼

開業半年的水記,老闆平時沒有賣辣雞翼,今次力撐雞翼節,特別選購了來自3個不同產地的乾辣椒粉來炮製。你以為撥開辣粉就無事?少年,你太年輕了,其實炸漿亦撈了辣椒油,又香又辣又脆。雞翼全部新鮮即炸,一咬就爆出肉汁,吃時唔好太猴擒,小心辣口呀﹗如果嫌未夠辣,可以請老闆添加四川帶回來的私伙辣油,包你食到噴火﹗雞翼節期間,買雞翼送魚蛋。

$32/6隻

供應店舖:水記(2樓C86號舖)

營業時間:11am-11pm

熱爆辣妹組:

4.最安心!麻辣單骨口水姣Wing

「無辣不歡」聽店名就知,老闆愛辣如命,店中的手撕雞、口水雞一向都很受歡迎。今次再自創辣汁做成單骨口水雞翼,單骨上,所以烹煮的時間縮短了,肉質更嫩滑。雞翼以招牌口水汁浸煮,入口既麻且辣,雞肉仍然保持彈性,$18/份約有4隻(8條骨),好食到唔太夠喉。

$18/份

供應店舖:無辣不歡(2樓2019號舖)

營業時間:12nn-10:30pm

5.最抵食!蒜辣雞中翼

望落造型熟口熟面,不就是B仔雞翼尖的變奏,老闆平時只賣翼尖,今次為了雞翼節,才推出雞中翼,用上大量指天椒、蒜頭調味,浸煮大約10分鐘。雞翼香腍入味,帶惹味辣勁,但又不是瘋狂死辣,食起來還有很重蒜香,食過翻尋味。

$26/6隻

供應店舖:Waffle Corner(2樓2020號舖)

營業時間:12nn-10pm

6.四川麻辣雞翼尖

由3位四川姐姐鎮守,主打川式涼拌涼麵,她們說成都人本身都極愛吃雞翼尖,今次就趁雞翼節推出這款家鄉小食。先用十多款配料的四川滷水將雞翼尖煮熟,放涼後,再撈上自調的麻辣汁。老闆話全部醬料調味100%家鄉直送,不過她們都明白未必個個都是辣妹子,辣味方面已經放輕手點,如真心愛辣,記得開聲,保證辣得滿意。雞翼節期間,凡買任何產品,可獲9折優惠,更加抵食﹗

$25/份

供應店舖: 冒菜(1樓B60B號舖)

營業時間:11:30am-9:30pm

7.麻辣花生粉雞翼

shake shake薯條食得多,shake shake雞翼又點睇?平時到Chok 雞買炸翼,已經有多種調味粉可以揀,好似:五香孜然、芝士、奶油洋葱、避風塘蒜頭、特級香辣、日式奇珍等,今次為雞翼節再加一款全新味道「麻辣花生粉」,將花生打碎,加上自家調味的指天椒辣粉,香辣並重,還有濃濃的花生味,吃時食到炸雞翼本身的油香,切成單骨,方便邊走邊食。

$32/6隻
麻辣花生粉

供應店舖:Chok 雞(3樓TOP世界3069-T18號舖)

營業時間:12nn-9:30pm

8.口水妹棒棒雞

專賣棒棒雞的紫天招,第一次用雞翼做棒棒雞,先以類似滷水的方式煮將雞翼浸熟,再砍開,放上涼麵墊底,拌入自家製作的口水雞醬,多香少辣,帶濃郁蒜香,味道有點似蒜泥白肉,惹味得來很有層次。

$26/小,$32/大

供應店舖:紫天招 (地下A48A號舖)

營業時間:12:30pm-10:30pm

9.麻芝雞全翼

主打泰國食物,今次以招牌海南雞應戰。老闆改良了平時最多人吃的海南雞,以雞全翼入饌,上面加上自家炒製的麻香醬,以及大量芝麻,望見已經流口水。雞翼不算很肥,但肉質有彈性,帶少少辣的醬汁剛好引出香味,令人越食越想食。老實說,食雞全翼很難顧全儀態,好彩泰風SO自設堂食企位,不用邊走邊吃。

$15/2隻

供應店舖:泰風SO(2樓2008號舖)

營業時間:1pm-9:30pm

好奇寶寶組:

10.花生友棒棒雞

你愛吃雞絲粉皮嗎?既然麻醬、粉皮和雞肉咁夾,老闆就靈機一觸將單骨雞翼放在粉皮上,再加入用花生醬、麻醬自家調成的醬汁,吃時記得要撈勻,滑嘟嘟的粉皮與濃香的麻醬,甜中帶鹹,加上肉軟香嫩的雞翼,爽口又彈牙,大大盒才賣廿零蚊,獨食最啱﹗想味道豐富點,亦可要求加點辣油,味道更香。

$26/小,$32/大

供應店舖:紫天招 (地下A48A號舖)

營業時間:12:30pm-10:30pm

11.+12.粒粒芝士雞翼+ 流沙黃金一字骨雞翼

「伏」的炸物,一向出色,放工時間,經常排隊。今次將店中兩大名物組成套餐,一定大受歡迎。最近勁hit的鹹蛋黃用來煮雞翼,本身已經惹味得過份;另加兩件去骨,釀入芝士粟米,再炸。前者鹹香雋永;後者芝味濃郁,兩者平分春色,一樣好味。

$40/份

供應店舖:伏(2樓2006號舖)

營業時間:2pm-10pm

13.熔岩芝士蒜香單骨雞翼

炸香的單骨雞翼,鋪上牛油、蒜蓉,再淋上大量mozzarella芝士,入爐焗香。一拎上手,熱辣辣,芝士果然如熔岩一樣,鋪天蓋地將雞翼蓋上,用叉拮起,竟然有拉絲效果,入口又香又脆,有濃濃的牛油味,很是討好,$48/8件,即叫即焗,想食,要比少許耐性等大約10分鐘,不過,絕對值得﹗

$43/8件

供應店舖:烤焗工房 (3樓Top世界3069-T11-T12號舖)

營業時間:12nn-9:30pm

14.激邪惡火焰芝士燒雞翼

潮食闆平時最出名的就是黑糖麥芽雞翼,不過最近有了勁敵,新推出的「激邪惡火焰芝士燒雞翼」,用竹籤串起,燒好的雞翼以片裝芝士捲起再用火槍燒一燒,芝士半溶,更香更滑,皮香肉嫩,食起來果然非常邪惡,不過一客才三件,都唔會好肥啫﹗(自我安慰mode)雞翼節期間,購買任何雞翼產品減$2。

$28/3隻

供應店舖:潮食閣(3樓TOP世界3069-T23-T25號舖)

營業時間:12nn-10pm

15.橙蟹雞中翼

咩叫橙蟹雞中翼?聽得一頭黑人問號。原來就是鹽水雞翼,不過老闆很好心機,逐隻拆肉,撈上卜卜脆的蟹子。想味道再豐富點?可要求加麻醬、加辣或加蒜,吃起來,皮肉香滑,最緊要啖啖肉,又食到脆脆的蟹子,口感嬴晒﹗加埋個九唔搭八的名字,非常葵廣﹗

$15/3隻

供應店舖:貓麵 (2樓2011號舖)

營業時間:1pm-10pm

16.辣子雞翼

今次雞翼節,單是辣雞翼已經有十款、八款,不過又酸又辣的,應該只此一家。海南王子今次以醃過的洋葱、辣椒、青瓜調成酸辣汁迎戰,淋在炸好的單骨雞翼上,多多酸,微微辣,非常醒胃,啱晒夏天,一件接一件,完全忘了甚麼是熱氣。

$30/8件

供應店舖:海南王子 (2樓2018號舖)

營業時間:12nn-10pm

17.+18. 華田雞中翼+蜜蜜燒雞全翼

賣開泰菜的曼菊今次搞搞新意,在原本醃雞翼的香茅、青檸配料內加入阿…華…田。嘩!充滿創意呀!燒好的阿華田雞翼甜甜地,帶麥芽香,又有幾分泰式風情。食的時候仲可以自己配上泰辣醬、沙嗲醬、酸辣醬等,味道更多變化。雞翼節期間,凡惠顧雞翼滿 $50,即送糯米飯小包。泰國人食燒雞都習 慣配糯米飯的,夠晒正宗。

華田雞中翼(前)$15/3隻、蜜蜜燒雞全翼(後)$15/隻

供應店舖:曼菊泰國料理(3樓Top世界T16-T17號舖)

營業時間:1pm-9pm

成擔心機組:

19.最飽肚!瑞士雞翼滷肉飯

主打麵線及滷肉飯等台灣小食,依足地道製法,滷肉飯加入豬皮、肥肉慢火熬煮近十個鐘而成,陳香醇厚,帶滿滿膠質,食起來味道香甜溫潤。老闆話滷肉飯的甜味,正好與甜美的瑞士雞翼一拍即合,於是想出將兩者結合,再加隻溫泉蛋,完美﹗

$35/小;$42/大

供應店舖:台南皇麵線(3樓85A號舗)

營業時間:12nn-10:30pm

20.蜜椒雞翼

「蜜椒」即是蜜糖加胡椒,老闆吃過某名店的蜜椒豬扒,驚為天人,就打算趁今次雞翼節推出此限定口味。蜜椒雞翼要做得好味,秘訣是即叫即炒,將雞翼煎熟,有柯打時再加醬料落鑊兜一兜,看似簡單的工序,但在小吃店要逐份做,卻很花心機。怪不得隻隻雞翼都脹卜卜,油香亮麗,入口香甜又帶胡椒的辛香,吃得出的鑊氣。

$29/6隻

供應店舖:東門町(3樓87B號舖)

營業時間:12nn-10:30pm

21.花雕花椒雞翼

好味的花雕雞翼要聞落有酒香,吃起來卻沒有烈油的苦味,雞肉不能死實,入味卻又不會過鹹,很考功夫。老闆賣了花雕雞翼多年,今次特地加入花椒、八角等,創出更有層次的新口味。隻隻雞翼都要浸過夜才夠入味,吃起來酒香滿滿,又帶吃到少少花椒的辛辣,味道立體。

$10/2隻;$28/6隻

供應店舖:名星小店(1樓B01B號舖)

營業時間:12nn-10pm

同場加映!

不能錯過的優惠:帶雞翼進店送黑松露醬

除了上面各款必食的期間限定雞翼,以下小店亦提供雞翼優惠,行過路過,唔好錯過。開心多士(2樓2005號舖):本身雖沒有雞翼供應,但凡帶同雞翼進店即送黑松露醬。

KOL店長同你玩遊戲!

MiHK香港製作成員Cotton 會於4/5現身葵廣,化身做臨時店長同你大玩雞翼mini game,有無信心挑戰我哋設計的雞翼「叉輪廚」先?

MiHK香港製作成員Cotton

靚女沙律親自餵你食雞翼!

有份參興港產電視劇《向西聞記》的靚女沙律,亦會來到葵廣,大派福利,親自餵你食限定的咖哩雞……翼!場內屆時會有大量打卡位,仲有一啖吞鬥快食雞翼擂台大賽,冠軍將得到一個月免費食雞翼金卡一張,活動多到數唔晒呀﹗記得嚟玩吓、吮吓、開心吓﹗

沙律

《新假期》葵廣雞翼節

舉行日期:2019年4月27日、28日及5月1日、4日、5日

舉行時間:全日

入場費:全免

延伸閱讀:

Kinder出奇蛋出雪糕!歐洲全新5款口味 繽紛樂甜筒+雪條雪糕三文治|網絡熱話

關注我們Facebook專頁
    相關新聞
      更多瀏覽