祖兒不愛勝利想識太陽
2019年02月15日03:00
祖兒到商台宣傳新歌《一種永遠》。

【星島日報報道】容祖兒昨日到商台宣傳新歌《一種永遠》,亦算是6月演唱會的序幕曲。雖然今年是她入行20周年,但祖兒希望屆時大家開心睇騷,不需要太感懷身世,只要「瘋狂」玩一晚便可。

祖兒踏入新一年即四圍飛,分別到了韓國及日本錄歌,稍後又會飛赴洛杉磯及北海道工作,亦會兌現承諾作歌給自己。她說:「考慮吓作唔作曲畀古天樂,因為創作不容易,生咗個仔如果畀人養都會唔開心啦!」

此外,祖兒早前跟BIGBANG成員勝利合唱新歌《Pretty Crazy》,她大讚勝利是語言天才:「佢好想學好廣東話,因為好鍾意睇香港搞笑電影,佢不單只得個Chok字,為人很聰明又好喜歡帶歡樂畀大家。」問到可有發展機會?祖兒斬釘截鐵地說:「唔會,反而希望佢快啲介紹太陽畀我識。(喜歡韓仔?)喜歡,我喜歡單眼皮的男生。」

至於經理人霍汶希(Mani)表示看好她於兩、三年內結婚生仔,祖兒謂:「吓?你問佢係咪幫我陀B呀?佢癡線o架,簡直集合蘇民峰同婦科醫生於一身,令我覺得今日不是2月14,是7月14。」問到會否閃婚?她說:「而家大部分都係一見鍾情,唔結婚又點生仔呢。(會否考慮剖腹生B?)一定啦!20歲的時候我已經這樣想,因為開刀有利感情世界。」

關注我們Facebook專頁
    相關新聞
      更多瀏覽