杏兒宣布懷第二胎:李氏農場可以開張了!
2019年01月30日03:00
大仔奕霆指住杏兒的肚,在想到底是弟弟還是妹妹?

【星島日報報道】39歲的胡杏兒前年為老公李乘德(Philip)誕下兒子李奕霆(Brendan),二人一直想再追個豬B,早前杏兒出席活動時明顯散發孕味,昨日她終於在社交網晒出BB超聲波圖,正式公布陀上豬寶寶的喜訊,並笑言「李氏農場可以開張了!」至於再做契媽的「胡說八道」眾姊妹都表示杏兒今胎生仔生女都開心。

胡杏兒追豬B願望成真,多次傳出再度懷孕的她昨日於社交網晒出BB超聲波圖,並留言:「豬寶寶終於加入,李氏農場可以開張了!」杏兒還特意用豬頭公仔遮去胎兒的樣子,只見超聲波圖中的BB舉起了一隻手。杏兒老公Philip亦有在社交網騷出大仔奕霆用手指住媽咪大肚的照片,宣布老婆陀第二胎好消息,他還笑言:「奕霆仔在想到底是弟弟還是妹妹呢?」

傳媒恭喜杏兒再做媽咪,成功三年抱兩的她興奮回應:「真係好開心!生到豬BB,真係湊夠開農場。上次陀住Brendan又係開緊工,今次陀住BB又係拍緊劇,可能BB旺媽咪工作,想陪住我開工,但今次拍到2月尾就完成拍攝了,所以還好,只是今次孕吐感覺比較強烈,成日無乜胃口。」

杏兒又表示會留港安胎兼陪大仔Brendan,她謂:「我拍完這部劇之後就應該會留在香港,既可多些時間陪伴Brendon,又可繼續接一些輕鬆而又應付得來的工作。最後,亦係最緊要,最想就係BB健康同平安!多謝大家祝福。」

據知杏兒現時已懷孕三個多月,其一班「胡說八道」閨蜜黃智雯和胡定欣即時在社交網留言祝福她。同是準媽媽的陳凱琳,還有鄭秀文、陳敏之及楊千嬅等圈中人亦有留言恭喜杏兒。

黃智雯開心地表示:「當然好替佢(杏兒)開心,我哋姊妹們都好乖,替Myo媽媽(杏兒)守秘密,我哋又做契媽啦!」至於胡兒可曾向姊妹們透露想生「豬仔」或「豬女」?智雯則謂:「都無所謂啦,都係開心事!」

另一位「胡說八道」成員姚子羚也興奮地謂:「係呀!佢(杏兒)又陀B喇!好開心呀,我哋有多個契仔喇!」子羚直言「胡說八道」眾姊妹一早已知喜訊,但留待杏兒親自宣布。問到會否希望杏兒今胎生「豬女」為「胡說八道」添新成員?她聞言笑謂:「我哋梗係無所謂啦!最緊要佢兩公婆鍾意,不過生仔、生女都一定好得意,而家見Brendan幾得意!」

胡定欣則笑言不需再替杏兒守秘密,她透露杏兒一直有意再生小朋友,但跟丈夫工作都非常忙碌,如此快速造人成功,真的替他們非常高興。定欣大爆眾姊妹對杏兒今胎是男是女各有所好,笑言:「見到Brendan好可愛,但係生女又可以着裙喎,不過我真係唔知男定女。」

關注我們Facebook專頁
    相關新聞
      更多瀏覽