仲記唔記得佢兩個? 童星王秉熹浸大畢業 勇奪全球大學電影獎
2018年11月28日16:15

【童星兄弟】要數童星界嘅代表人物,一定唔少得王秉熹(Jeffrey)同王樹熹(Jacky仔)兩兄弟,佢哋而家已經分別23歲同19歲,大個仔喇!雖然冇拍戲一段時候,但係兩兄弟對影視嘅興趣,更加由幕前延展到幕後,Jacky仔而家喺城大讀緊媒體與傳播,而哥哥Jeffrey,就啱啱喺浸大電影系畢業,導演作品仲要攞咗個「全球大學電影獎 」添呀!

撰文:SundayKiss 圖片:新傳媒資料室、Jacky仔ig、劇照 | 編輯:東方新地

延伸閱讀:

《義不容情》第1-4集劇情 | (附精華片段!)藍潔瑛演活窮媽媽梅芬芳 捲入謀殺案被岳華判死刑

《義不容情》第5-9集劇情 | 周海媚登場暗戀溫兆倫、有康有健兄弟多次爆爭執

童星王秉熹勇奪全球大學電影獎

Jeffrey同Jacky仔感情好好!哥哥畢業,細佬點會唔撐場!

23歲嘅Jeffrey,雖然大個咗,但係仲搵得番細個嗰個樣。反而Jacky仔,就高咗瘦咗,以前嗰種童稚消失哂!

「全球大學電影獎 」一直被視為促進香港及大中華區內專業人士、學者及學生融合的盛事。Jeffrey係今屆唯一得獎嘅香港學生,相信呢個獎項可以令佢更有信心追尋自己嘅導演夢!

王秉熹
王秉熹

中學讀喇沙 靠《哈利波特》學好英文

中學時就讀喇沙書院嘅Jeffrey,原來當初升讀名校之初,都遇過挫折。王媽媽喺專訪中表示︰「哥哥考喇沙,係因為當時佢讀嗰間小學認為佢得,建議佢試吓,結果得咗。最初,佢英文程度一定唔夠人哋叻,中文就冇問題,咁啱嗰陣流行《哈利波特》,佢好沉迷,中文小說版每日可以睇七十幾頁,相反英文就睇得十幾版。我好嬲,撕爛晒佢七本書,佢好傷心喺度喊。同佢講,如果你想睇,我會買番七本英文版俾你睇,送埋本字典俾你查。因為佢追緊結局,焗住要睇英文版,逐粒字查字典,我仲叫佢,見到啲覺得有用嘅句子就抄低。結果,三個月之內,佢英文成績跳升至全班第一。」王媽媽當初嘅狠下心腸,就造就咗兩兄弟嘅好成績喇!

Jeffrey喺《宮心計》中飾演杞王,係幫陳豪重掌朝政嘅關鍵人物。

令人印象深刻嘅,一定唔少得《十兄弟》裡面嘅「大喊十」啦!

09年嘅《大冬瓜》,就係Jeffrey告別童星年代嘅演出喇!

Jacky仔因升中淡出

小五嗰年,Jacky喺螢幕上突然失蹤,原來一切都係王媽媽嘅計劃。為咗要Jacky仔專心為升讀中學作好準備,所以刻意斷絕Jacky仔所有工作,最終Jacky仔都不負所望,考入第一志願中學。

王媽媽話,Jacky仔細個時,補習、興趣班,乜都冇!興趣就係拍戲,所以王媽媽同兩兄弟講:「如果你哋鍾意拍戲,一定要早啲溫習課本,做好準備,就算測驗、考試,佢哋都會照樣拍戲,冇問題,因為一早已溫晒書。況且佢哋對自己要求都好高,成績少過九十分都覺得差。Jacky仔由一至六年級都係優異生,哥哥喺五、六年級嗰陣,仲係全級第一名,從來都唔需要學其他嘢惡補。」

而家喺城市大學讀媒體與傳播系嘅Jacky仔,依然好鍾意做戲,仲希望畢業之後可以做番「本行」!

入到大學,Jacky仔讀書成續依然好好,GPA 有3.6,仲想以交換生身份去美國或者英國,學多啲嘢!

07年同歐陽振華拍《爸爸閉翳》,佢叫Jimmy仔。

09年同苗喬偉、袁詠儀拍《疑情別戀》。

Jacky仔仲同肥姐同台合作過㗎!

陳詩慧喺街頭被星探發掘

喺大台劇演盡靚花旦童年嘅陳詩慧,曾經係《宮心計》同《公主嫁到》嘅童年佘詩曼,《女拳》中嘅童年陳法拉,吓吓真眼淚演繹,真係睇到人心都實晒!不過自從升中之後,已經冇乜再見佢拍劇喇!眨吓眼,小三好而家已經係個17歲嘅美少女,出年(19年)4月,就要考DSE喇!

陳詩慧
陳詩慧
陳詩慧18個月大已經好可愛,又淡定!

陳詩慧同家姐小慧,兩個都係童星,兩姊妹都係因為個樣得意可愛,畀星探喺街頭發掘!

家姐小慧係御用政府宣傳片同教育電視童星,因為13歲已經係童星嘅尷尬年齡,所以小慧就暫別銀幕,專心讀書。

而詩慧05年就開始拍電影,先後拍過謝霆鋒、房祖名主演嘅《男兒本色》。

仲有古天樂、大S嘅《保持通話》,部部都係大片。

就係因為《保持通話》嘅演出,畀大台監制梅小青賞識,於是就邀請詩慧飾演《宮心計》入面嘅小三好!

拍《宮心計》嗰陣,詩慧幾乎場場戲都要喊,但係一樣難唔到佢!

頭兩集就做小三好,到大結局就做三好個女,鄭嘉穎飾演嘅高顯揚,就係佢「爸爸」喇!

小三好與小金鈴當時都好受觀眾歡迎㗎!但係因為喺片場有私家椅坐,又可以自由出入化妝間,所以搞到其他小朋友眼紅啦!

到拍《公主嫁到》又再「連戲」做佘詩曼嘅小時候同囡囡,其實真係似樣咩?

喺《女拳》扮演童年陳法拉,辛酸兼缺乏母愛,絕招依然係喊得夠自然!

拍《法證先鋒III》,同視帝黎耀祥做父女。

《流浪漢世界杯》,同黎姿有唔少對手戲。

據聞詩慧曾獲邀演出周杰倫主演嘅《逆戰》,但係因為電影公司要求hold詩慧兩個出埠拍攝,陳媽媽覺得太困身,又好難同學校請咁長假,所以最後都係推咗,六位數字嘅片酬見財化水喇!不過失去一次機會,詩慧仍然有好多演出機會,仲同好多大卡士合作過!好似有林峯啦!

有蔡少芬啦!

有張可頤啦!

仲有張家輝!

詩慧喺電視嘅出鏡率一度好高,但係到4年班上學期,考試成績唔理想,老師勸她專注學業,不過佢仍然堅持拍劇,後來入咗元朗區官立中學之後,就開始暫停拍劇喇~

詩慧今年已經17歲,同家姐小慧一樣,大個咗都係咁靚女,戴起副大框眼鏡,仲有幾分文青氣息!

View this post on Instagram

#20180211 👊🏻❤️ @shannonchan211 I am happy🤤 . 家姐呀家姐,你依家就坐喺我隔離,但係有啲嘢實在是太骨痺,所以我用文字表達比你知啦😚 . 基本上呢幾年任何時刻同你一齊都好好好好好開心,無時無刻都笑到喉嚨痛同肚痛,雖然大家都心知肚明只要一齊出街就會笑到好攰,之後又嫌棄完一輪又攬埋一嚿 . 但係,真·多謝你, 多謝你凡事都顧慮咗我先,多謝你明明第二日早過我起身都聽我發牢騷,多謝你會喺我最無助嘅時候攬實我,多謝你慳埋慳埋嘅錢洗落我到,多謝你每次出街都話如果有車牌就好因為可以帶我周圍去同埋我唔洗咁攰,多謝你會突然間彈個栗子蛋糕出黎氹我開心,多謝你錫到我燶,多謝你寵我寵到成個公主咁🤤 . 我愛號智,號智愛我👊🏻❤️ . 最後,最重要都係多謝你希望有個妹陪你🤤雖然呢個妹成日都恰你,但係你都仲係咁愛佢👊🏻❤️ . HappyBirthday,我愛你❤️

A post shared by @ shannonmoonmoon on Feb 11, 2018 at 7:50am PST

細個時個樣仲喺度,不過就多咗好多少女味啦!

見到佢ig有Drama嘅相,仲攞咗個最佳女主角獎添!相信詩慧對演戲仲好有興趣嘅!

View this post on Instagram

#20170706 💙 兩年前, @agnestong_0126 同我講 下年繼續喊 攞冠軍,我答 好吖 承你貴言,但係上年無社drama,所以我無機會兌現承諾。 兩年後, 我兌現咗攞冠軍呢個承諾,但係我無喊到😂 . 自問唔係一個好導演,因為做導演唔簡單,亦唔單止教演員用咩語氣有咩動作走咩位,我知可以唔止係咁。 自問唔係一個好編劇,因為我做到嘅淨係執下對白,改下字,提下啲可有可無嘅意見。 自問唔係一個好演員,因為我到臨上台都未熟對白,開幕嗰陣,陳詩慧都仲未離開。 . 世界上無人完美,所以一定有人唔鐘意自己,一定有人唔認同自己,一定有人覺得我唔值,正如我上台經過觀眾席聽到有把女聲話 點解會係佢嘅? 但係,都要講句,我會努力。如無意外,呢個將會係我喺趙中最後一個演員獎,多謝張sir同評判,比我攞咗今年唯一一個亦係最後一個演員獎。 . 追夢的路,一定滿佈泥濘,但都不是你停止追夢的藉口。 . 多謝每一個同我講過加油嘅人,多謝每一個信任我又肯跟我建議做嘅人,多謝每一個同我一齊搏咗2個禮拜嘅人,多謝每一個今日有比掌聲嘅人⋯⋯ . 當我最信任嘅人都無支持我嘅時候,我就知得自己可以支持自己。 . 不過可幸嘅係,水,即使分開,最終都係會 流入大海,再次相遇… . 最後,吳爾凌,多謝你。 . King of victory This is HONESTY.💙

A post shared by @ shannonmoonmoon on Jul 6, 2017 at 3:39am PDT

出年就要考DSE,相信詩慧嚟緊都會以學業為重!唔知考完試之後,仲有冇機會睇到佢喺幕前演出呢?

吳諾弘 四年級已在學界稱王

最近熱播嘅大台劇《是咁的,法官閣下》,片頭一幕黃智賢同關禮傑喺終審法院大樓門前嘅一場格劍畫面,唔知大家有冇留意?為呢場戲擔任指導嘅,就係由童星晉身成劍擊手嘅吳諾弘擔任指導㗎喇!由3、4歲開始做童星,而家諾弘已經19歲,而且早兩年仲選擇暫時休學,全職做港隊劍擊手!

吳諾弘
吳諾弘

諾弘小學讀嘅啟基學校,自95年創校,成立劍擊隊超過17年,多次成為九龍區學界團體冠軍,唔少港青、港隊代表,都係出自呢間學校,當中包括崔浩然及最年輕的亞運代表鄭曉為,稱得上係「港隊搖籃」。

吳諾弘
吳諾弘

2012年,諾弘成功考入拔萃男書院,5年嘅學界生涯,為學校同自己都贏咗唔少獎。

其中包括有「學界奧斯卡」之稱嘅中銀香港紫荊盃- 最佳運動員(劍擊)。

成為職業運動員後,吳諾弘經常都會隨港隊到世界各地參加比賽,早前至喺亞洲U23劍擊錦標賽,同隊友一齊贏得男子花劍團體賽金牌。

棄讀男拔 做全職運動員

喺拔萃男書院讀到中五,諾弘因為考慮到運動員嘅黃金期實在好短暫,於是就同父母表示想休學,投身成為全職運動員。

而父母對諾弘嘅諗法亦都相當支持,認為讀書幾時讀都得!

吳諾弘 擔任劇集劍擊指導

幫大台拍咗十幾年劇,今次諾弘喺劇組就有一個新身份,就係劍擊指導喇!

其實諾弘同Ben哥哥黃智賢都有少少淵源㗎!

十幾年前,Ben哥哥仲好後生,諾弘仲好細個嗰陣,佢哋已經一齊拍過廣告㗎喇!唔知Ben哥哥睇番呢張合照,會唔會好感觸呢!

細細個有唔少時間都係喺片場度過,拍過嘅劇都唔少啦!

第一次拍劇

諾弘第一次拍劇,就係2005年嘅《心花放》,當時係做陶大宇同向海嵐嘅囝囝,不過陶大宇係唔知諾弘係佢個仔嚟㗎!

《酒店風雲》就做郭可盈同馬神個仔喇!

《荃加福祿壽探案》都算突破喇!唔係做人個仔同細佬,而係做鍾嘉欣嘅情郎!?冇錯!!一定係拍於《殺人犯》後,因為戲入面係講佢患有罕見不老症!

阿姐喺劇中係偵探社社長,即係負責拉佢啦!

《宮心計》入面就做皇子李怡,即係童年版嘅陳豪。

喺戲入面明明好醒,但係就要詐傻保命

09年,開始大個仔喇,同蔡少芬拍《飛女正傳》,就係做一個好老積嘅小朋友,睇唔起戲入面嘅蔡少芬想討好佢,嫁畀佢Daddy。

拍《最美麗的第七天》,當年唐詩詠仲係成日做緊人哋個妹,而家都做咗視后喇!

《巨輪》入面嘅少年羅威信,應該係近年觀眾深刻啲嘅角色喇!咁睇又確係同蕭公子有啲似樣啦!

拍《巨輪》成日都要過澳門取景。

最辛苦就係要扮偷渡客,上山下海咁同阿哥由大陸偷渡嚟香港啦!

再大個啲,演出都少咗,客串過《愛回家》啦。

最近期拍過嘅劇,都已經係2015年嘅《四個女仔三個BAR》喇!

盤點十個晉身電視劇女主角的港姐

網民:準備畀人照肺啦!吳若希大爆TVB講明要撐周柏豪

網民:好難信佢無整過囉! 索爆張曦雯舊照流出惹整容疑雲

人妻岑麗香驚變獨眼巨人

江嘉敏被踢出視后候選名單 原來名額畀佢搶走咗?

延伸閱讀:

遺傳媽咪美好身材!葉玉卿囡囡 大晒優質股

關注我們Facebook專頁
    相關新聞
      更多瀏覽