【批鬥座的延伸】優先不優先?搭電梯無辜辜遇批鬥
2018年08月10日19:58

(以下圖片,除咗第一張,應該都係圖文不符,哈哈)

我確實係幾懶嘅,大肚時已經講明一定要推車唔會抱,抱住BB之餘仲要揹自己袋同奶粉BB,好辛苦姐!當然生咗Aster姐之後發覺唔得,唔通佢扭抱扭眼瞓唔抱佢咩~咪變相間中會一個推住吉車,一個抱住BB,好多媽媽都會聽過長輩講:「以前我都係一個人搞掂!」的而且確上一輩係強嘅!

尋晚喺奶奶度晚飯之後照常推住Aster姐搭地鐵返屋企,落車如常去月台中間搭電梯(升降機),夜晚10點通常都無乜人,不過今晚咁啱鬆鬆動動都入滿咗。個站部電梯由閂門到上一層仲慢過蟻躝,今晚仲特別漫長,足夠聽咗個故事。

0
0

我已經係最尾幾個入,而喺我後面有個阿嬸,突然同同伴打開話題: 「呀之前我搭電梯有架BB車,個阿媽大大聲話:『啲人有手有腳都要搭電梯!』」 「咁我腳痛呀嘛,有BB唔識行樓梯呀?有BB就抱唔到咩?唔識抱就唔好生!」 當時電梯得Aster姐一架BB車,雖然應該唔係話緊我哋(我估),但肯定係講畀我哋聽掛? 終於出電梯,好好奇望下個阿嬸,貌似六十歲左右又未到阿婆咁,佢今晚應該無腳痛,一支箭就衝咗去出大閘,仲一路行一路講:「咁係火滾吖嘛!」而佢同行仲有另一個阿嬸,就明顯有腳患要用行山杖喇!

阿嬸,係咩驅使你三唔識七都專登講說話我聽?係無聊?係無謂?係...或者咁睇啦,會唔會係Aster爸推住車入電梯,我跟住佢哋入就係「有手有腳都去搭電梯」啲人?真相係點真係無從稽考,我哋唯有互相恥笑。

0
0

0
0

我有少少嬲嬲㗎其實,自問大肚前唔係見到架車好吉或者有乜唔舒服,基本上普通位都唔會坐,到大肚嘅時侯,7個月之前大部份人都以為我係肥,係間中去完講座拎/揹住印有BB品牌嘅袋或者被眼利發現先會被讓座,記憶中5次都無,多數仲係男士同阿叔,幾搞笑!我只係想講,有時啲嘢醒唔起,有時又會突然醒起,地鐵咁多人,有時啲人背住我又遮住晒,睇唔到我好出奇咩?

0
0

0
0

到孕後期真心攰啦,我一上車都會厚面皮唔客氣就9衝去關愛座,心諗都係坐幾個月姐自我感覺良好!到生咗Aster姐之後雖然無經常出街,不過大多數返工日都要日夜來回奶奶屋企,推車搭地鐵其實都唔係咁需要坐,但係搭電梯真係必須走唔甩!

0
0

0
0

我大肚嘅時侯依然會搭扶手梯或者行樓梯,當然我覺得自己當時係OK。但有小朋友之後,就唔可以「覺得自己OK」就GO。有時去到嘅地點無電梯(e.g.炮台山站)、電梯好很遠(e.g.太古站)、電梯等極都入唔到(e.g.朗豪坊!),Aster爸都會貪方便推住車撘扶手。而我真係遇到壞電梯或者等唔到電梯或者好很趕時間先會去扶手,雖然我都做到,但其實內心係有啲怯。多人等電梯而部電梯又細(e.g.銅鑼灣站)有乜好怕?如果時間許可我可以等,最多咪等多幾架應該就入到。

0
0

0
0

幾個月前試過一次真係月台太多人,等電梯都好多人,而我臨入電梯先發現後面係架輪椅,我突然拋低一句「我去行樓梯呀」就拋夫棄女衝咗上樓梯。不過,我都係做過一次咋~

「關愛座」原本叫「優先座」,真係「優先」㗎咋,唔係屬於你㗎!講咗咁耐,其實坐底同撘電梯遇到嘅問題一樣,唔係想討論邊啲人應該關愛。需唔需要關愛自己知,人活到幾十歲,有咩時候可以完全無病無痛無受傷過?唔想人濫用,唔通有無得坐底同撘個電梯都要檢查咩?

0
0

呢個地方係有啲人唔自律,而更多人係「老馮」!

既然社會咁多廢乜廢物淨喺識喺度磨「關唔關愛」,不如廢晒形同虛設嘅「優先」啦~係咪先?

是次小分享完畢,有興趣可按 麵語錄食玩遊記 by Aminn 或 C家重地 其他分享 :)

Aminn | Beauty.Food.Fun.Travel.Trendy|

麵語錄食玩遊記 by Aminn (Lifestyle) www.facebook.com/m.for.aminn / www.instagram.com/starzaminn

C家重地 (Parenting) www.facebook.com/sy.lam.family

原文連結:

【批鬥座的延伸】優先不優先?搭電梯無辜辜遇批鬥

相關文章:

【張宇人=人見人憎?】知唔知咩叫面斥不雅?

Aminn

自由撰稿人,主打美容扮靚飲飲食食玩樂無窮,曾獲邀出版合輯《80後》、《我的博客城2》及《我的博客城》

  • 關鍵字
關注我們Facebook專頁
    相關新聞
      更多瀏覽