師傅鬼上身爆喊網民讚好戲 Bob朱智賢嚇到呆
2017年08月01日11:58
龍哥真係鬼上身定假喊呢?

【星島日報報道】《兄弟幫》主持林盛斌(Bob)、梁烈唯等人拍攝暑假特輯《Big Boys歷險記》,與嘉賓主持張惠雅(Regen)、朱智賢、謝東閔等人到訪靈異秘境、挑戰荒島求生等等。日前播出的第一集中,一班主持人日光日白尋找城市傳聞的西貢結界,不過冇乜料到,都只係有主持人話唔舒服想嘔,驚嚇度零。

第二Part則噱頭多多,請來奇門法科師傅「龍哥」杜慶龍同行,齊齊去交通意外黑點西貢清水灣道進行路祭,將亡靈導向往生。龍哥配合手勢加上口訣「乾坤一開,三七氣流一轉,玄天大帝指令一開,七色令旗開晒佢......」目標係同亡靈對話及超渡。不過網民爆趣指龍哥可以參加內地節目《中國有嘻哈》,freestyle rap無難度,仲有人話「司徒法正都冇佢咁funny」。

戲玉就係龍哥作法期間,突然被幽魂附身,聲線吊高八度講野,爆喊多謝工作人員幫忙,又拜又跪地,相當凄厲;身旁的Bob、朱智賢等人都睇到呆、皺晒眉,事後都話驚驚同想喊。龍哥則話亡靈透過佢嘅身體去多謝大家,不過就冇多謝自己。

真真假假,網民唔分辦,大家都一致畀個Like龍哥,讚佢係「最佳男主角」:「龍哥啲戲掂,喊戲有眼淚」、「BOB唔叫佢地俾D掌聲」、「笑到出晒汗」、「一睇完龍哥就知佢壇數高,有料到」。

關注我們Facebook專頁
    相關新聞
      更多瀏覽