無綫斟拍劇 吳美珩 專心湊仔拒復出
2017年07月31日19:33

98年經典劇《天地豪情》深宵時段重播,勾起好多人電視撈飯嘅往事,亦都勾起網民對當年上岸嘅神級花旦蔡少芬、郭藹明、 吳美珩 等的傾慕之情。再攞當年花旦拍埋今日小花比一比,咦,點解美貌同氣場爭幾班?一個字:回憶總是美好的!其中仙氣美魔女代表 吳美珩 其實近年就多次被大台監製、高層親自出馬邀出山,可惜退出幕前十年嘅 吳美珩 ,專心相夫教子好享受闊太生活而一再婉拒。

photo:新傳媒資料庫、無綫電視截圖

吳美珩 專心湊仔拒復出

吳美珩係96年華姐亞軍,出道不久即受力捧,有份演出處境劇《真情》、《刑事偵緝檔案III》,98年喺經典劇《天地豪情》中演羅嘉良嘅前女友甘鳳欣,雖然演出經驗不多,但劇中與撈家有唔少感情戲份,自然嘅演出亦都令觀眾留下深刻的印象。此後 吳美珩 演出不斷,如《大澳的天空》、《刑事偵緝檔案IV》、《烈火雄心》、《碧血劍》、《九五至尊》、《下一站彩虹》、《鳳舞香羅》等。01年吳美珩同「撈家」羅嘉良於《街市的童話》再度合作,演「嚴美珠」一角,之後喺《太極》、《人間蒸發》《女人唔易做》、《愛情全保》更擔正做女一。

吳美珩好有氣質,喺《天地豪情》中演富家女甘鳳欣相當稱職!

吳美珩喺劇中飾演的「甘鳳欣」同撈家有不少感情戲,可惜「甘鳳欣」最後因服藥失救而死。

江華同吳美珩合作多套劇集,《楚漢驕雄》係其中之一。專心湊仔 淡出幕前

07年《妙手仁心III》出街之時,其實 吳美珩 已經大住肚,首次承認早於01年已經同美藉台商王華麟成婚。同年為丈夫誕下大女Maegan後即告別娛樂圈,11年再生多個囝囝湊成一個好字,10年來專心相夫教子享受50億人妻闊太生活。除咗捕住電視機睇重播,要再睹吳美人風采,去名店或者一對寶貝女就讀嘅漢基國際學校仲大機會!

絕少公開露面的吳美珩去年初陪丈夫出席新年晚宴,難得盛裝打扮,一貫有貴氣又有仙氣。

家庭至上的吳美珩月初陪同兒子出席完學校活動後,由司機接載返歸。

網民心目中的仙氣女神在囝囝面前都係慈母一位,見到囝囝大汗淋漓,出手抹汗又撥頭髮。女神又是慈母

雖然經典重播、仙氣 吳美珩 再成娛樂版及網民焦點,不過虛名嘅嘢一啲無影響闊太日常。連日來依舊買餸、湊仔女為樂,早前就被本刊發現44歲的 吳美珩 陪住6歲囝囝回校參加角色扮演活動。同其他慈母一樣, 吳美珩 望着戴上自製高帽的囝囝一臉關愛、舉起手機不斷拍照,期間有其他家長要求合照,亦都笑笑口有求必應。

同其他家長一樣,吳美珩在校園內不斷追着囝囝走,又用電話不停拍攝囝囝趣緻造型。

淡妝吳美珩參加學校活動時與其他家長有講有笑,被要求合照留念時,亦都來者不拒非常友善。

吳美珩為50億富商老公誕下一子一女,現年分別10歲和6歲,一樣就讀寶馬山漢基國際學校。高層出馬請唔郁

之不過想佢出山難度爆燈,據知十年嚟其實不斷有監製游說 吳美珩 復出,之前金牌監製李添勝親自出馬,度身訂造《呂后傳》劇本、更話明拍攝時間會盡量遷就縮斷騰出家庭時間,可惜既沒有戲癮亦不志在,吳美珩始終不為所動,之後再搵名單之內嘅佘詩曼又因頸傷舊患為由推咗,結果直至李添勝榮休,《呂后傳》始終因為搵唔到擔得大旗人選不了了之。

被吳美珩婉拒後,《呂后傳》曾經搵嚟佘詩曼拍攝宣傳片,不過阿佘最終一樣因為傷患辭演。

退出娛樂圈後少友同圈中人來往,上次與宣萱、Do姐等人飯聚,已經係兩年前。復出幕前零希望

較早前《妙手仁心III》重播反應好,無綫高層又再出手出口,不過 吳美珩 仍不為所動,知情者透露:「唔單止無綫搵 吳美珩 ,好多品牌event都接觸過,不過佢都推咗,話要湊仔。」一個 吳美珩 一個黎姿都只可以成為網民同觀眾的集體回憶﹗

經典重播,女主角黎姿同吳美珩當年已經係女神,十年後十足食咗防腐劑一樣兼且保持仙氣,可惜兩位都上晒岸做咗闊太,復出無望。

《妙手》之後,吳美珩再拍埋套《太極》正式收山,07年誕下大女後便甚少在公開場合露面。

全文完

相關文章:

暑期親子樂 千嬅 子丹 茵媺 暑假歎世界

幾年內閃電轉女 王宗堯 專食廿歲女

重新認識 新一代Racer 系列$549就有交易

關注我們Facebook專頁
    相關新聞
      更多瀏覽