食糭食到滯? 山楂桔餅薏米茶 清熱 消滯
2017年05月15日18:43

端午節糭食到滯滯地?Blogger小小豬媽教煮依個既 消滯 之餘,又可以化痰潤喉嘅涼茶,一齊嚟試下啦!

撰文&相片:小小豬媽

我好耐之前都曾經煲過山楂茶俾小小豬飲,不過當時佢就唔太鐘意,話個味太酸唔多肯飲。今次其實我都考慮左好耐,都係有啲怕小小豬唔飲,始終我煲湯同涼茶都係為左小小豬嘛!

不過我見今次除左山楂之外,仲有生薏米同桔餅,都係啲清熱同化痰潤喉嘅材料,所以就放膽一試,就算小小豬唔飲,我自己飲都唔錯,因為山楂可以消滯之外,仲可以燒脂去水腫,飲左仲唔即刻瘦啲啲!

材料就需要以下幾樣:山楂四両、生薏米一両、桔餅兩個、甘草4片同片糖(一兩相等於37.5g)~

所有材料浸洗一陣;桔餅就切開細細粒,咁就會易啲出味~

煲內放入4公升水,待水滾後加入所有材料(片糖除外)~

待再滾水後,先用大火加蓋煲約15分鐘~

然後轉慢火加蓋煲多45分鐘~

最後可以因應個人口味加入片糖,再用中火煲15分鐘就得~

熄火後就要即刻夾起啲材料,因為如果浸得耐,個山楂味就會更加出,咁就會好酸啦~

其實煲起嚟又真係唔多錯,入口唔會太酸但又有少少桔味,我覺得雪凍左個味就好更加好飲,所以小小豬都唔多抗拒,都肯乖乖咁飲一杯啦~

自己煲當然要嘗面,所以我自己都有飲,飲完喉嚨又真係幾舒服,有少少甘甘地嘅感覺呀!

溫馨提示:由於材料都涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,睇下呢個湯水啱唔啱自己呀!

BY 小小豬的成長日誌

相關文章:

【石垣親子遊】必吃4間美食店! 美景手工雪糕 X 石垣牛漢堡 X 鄉土料理

不同流產方式對身體傷害也不一樣?

8位萬千寵愛在一身的 小公主

關注我們Facebook專頁
    相關新聞
      更多瀏覽