何啟南獲「反派王」豬肉獎 網民戥可憐
2016年02月02日07:00

做反派做到出晒位嘅,除咗「音樂情人」鄭子誠之外,仲有何啟南。聽個名你未必知佢係邊個,不過你見到佢個樣,就應該記得佢就係《通天幹探》天狗、《刑警》仇大虎、《叛徒》黑狗哥、《梟雄》「鐵頭」,仲有《飛女正傳》高層淫魔程漢、《使徒行者》張永權等等。點解個個都係大反派?事關佢基本上戲路只有兩種:第一係惡霸、大賊、黑幫;第二係斯文敗類。

呢日何啟南仲拎埋獎,不過就唔係大台認同佢實力,打算係台慶畀個獎佢,而係佢成功係《Sunday好戲王》入面,由曾志偉手中拎到「另類好戲王」呢個豬肉獎,但就有唔少網民戥佢可憐,覺得大台玩佢。

其實何啟南80年代中出道初期,同過陳加玲、林憶蓮一齊做香港電台主持,1986年佢首部電影《青春怒潮》已經做主角;第2部電影《最佳福星》導演仲正正係頒獎畀佢嘅曾志偉,而比較多人識嘅就應該係1988年許冠文嘅《鷄同鴨講》入面,做老許記燒鴨懶惰員工一角。網民覺得何啟南演技同外形都唔差,認為佢至少應該得到更多機會同更好嘅角色,他自己亦講過做反派已經做到悶。

講番「另類好戲王」呢個豬肉獎,攞完之後嘅藝人,繼續喺大台做二打六同佈景版,對仕途一啲幫助都冇。所以話呢個獎盡顯大台虛偽之餘,更令觀眾覺得何啟南星途欷噓都算數,仲要畀大台咁玩法,喺傷口上灑鹽,都真係幾陰公!

關注我們Facebook專頁
    相關新聞
      更多瀏覽