拍電影捱過燒傷斷手 錢嘉樂:曾考慮轉行
2017年07月24日09:00

(如看不到YouTube,請觀看優酷視頻。)

提到錢嘉樂,總讓人想起他幕前的搞笑形象,其實他還是多部電影的幕後功臣。14歲經哥哥引薦入行成為武行(動作特技演員),其後表現突出而獲邀加入洪家班,曾擔任成龍、洪金寶等動作演員的替身,出生入死的危險動作,在錢嘉樂眼中成為了生活日常。如今錢嘉樂成為獨當一面的電影動作指導,更擔起了行業承傳的重責。

14歲當武師 被洪金寶賞識

錢嘉樂當初成為武行,是由於五哥錢小豪希望早已輟學的他能找到工作糊口,當時錢小豪加入了邵氏電影公司訓練班,認識不少龍虎武師,故引薦錢嘉樂入行。成為武行之後,錢嘉樂一直以散工方式到邵氏、麗的電視等不同片場工作,直到他在嘉禾參與拍攝《奇謀妙計五福星》、《神勇雙響炮》及《A計劃》,引起了洪金寶的注意,從此改變了他的一生。

錢嘉樂表示:「大哥大(洪金寶)叫彪哥(元彪)打電話俾我,問我有無興趣加入佢哋,第一部戲就要去西班牙拍,當時都考慮好耐,始終好多人一聽到入成家班、洪家班,都會覺得你可能入去半年唔夠就要揸拐杖。」但錢嘉樂最終還是加入洪家班,並隨大隊遠赴西班牙為新片《快餐車》開鏡。他說:「人哋認為你得,如果你都拒絕呢個機會,咁你就睇唔到以後。」

圖:拍攝電影《龍的心》

加入家班 片場邊學邊做

錢嘉樂認為加入洪家班,絕對是人生轉捩點,而洪金寶對他的言傳身教更是畢生受用。錢嘉樂表示:「咩叫做『家班』呢?就係你入咗個班底就乜都要做,乜都要試。即使大哥拍緊文戲都要喺旁邊準備,初初都會抗拒,但慢慢就有啲長輩會教導我,點樣爭取機會。」錢嘉樂形容片場就好像寶藏一樣,只要主動便必有所獲,更重要是學習到擔當片場內多種工作。

嚴重受傷成心理關口

錢嘉樂表示,當武行受傷是尋常事,但一次難忘的受傷經歷令他曾考慮轉行,他表示:「武行最怕係受傷過之後再面對差唔多嘅動作,如果過唔到心理關口,你可能就要轉行。」他說:「我試過喺《龍的心》要喺3樓撞穿玻璃跌落檐篷再彈到車頂,點知錯過檐篷,直接從3樓墮地,要即場送入醫院。」養傷了一段時間的錢嘉樂,其後拍攝《東方禿鷹》時又因拍攝爆炸場景,意外嚴重燒傷,在醫院療傷期間他仍到片場探班,剛巧碰上需要替身從懸崖跳下來,並要準確落到行駛中的軍車上,錢嘉樂立即主動請纓,負傷上陣。

他憶述:「我喺懸崖上面,望住地下等導演拍完另一個外景返嚟,因為有過之前《龍的心》受傷嘅經驗,嗰種痛係刻骨銘心,當時越諗越驚,都有諗過唔跳,但如果唔跳就要轉行,結果我喺山頭唱歌唱咗一個鐘頭,唱到自己好激昂。」最終動作順利完成,衝破陰影令錢嘉樂感到無比興奮,他表示:「一做呢啲動作,你唔可能諗點樣受傷,點樣失敗,你只能諗點樣做到,一定要信自己。」

圖:拍攝電影《東方禿鷹》

最欣賞謝霆鋒

錢嘉樂坦言:「咁多年嘅特技人生涯,我哋唔係特別啲,到後來做到高難度動作,就係因為我遇到好教練—洪金寶。」從洪金寶身上,他學會發掘演員潛能,並應用在擔任電影動作指導之上。錢嘉樂指出,現在大多演員拍攝動作片都需要鏡頭剪接輔助,唯獨有一位演員讓他印象深刻:「我記得拍《逆戰》嘅時候,林超賢導演想謝霆鋒喺5樓跳落農夫車,而霆鋒亦好希望創作一個自己嘅動作鏡頭。」惟擔任該片動作指導的錢嘉樂卻感到壓力,他表示:「我唔係淨係識佢,我仲識四哥(謝賢)同拉姑(狄波拉),我都要向佢父母交代。」他透露,謝霆鋒初猶豫片刻,最後堅持完成鏡頭,他認為觀眾會看到演員的付出,亦印證歷來動作巨星的成功從來沒有僥倖。

圖:出席第53屆金馬獎

構思場景 獨創錢氏風格

錢嘉樂為電影設計動作場景,往往有自己一套血腥寫實的風格,由吳彥祖在《旺角黑夜》頭撞門鎖、《新宿事件》被斬斷手掌,以及《門徒》廖啓智手掌被鎚子敲斷等,一幕幕令人觸目驚心的場面均是他悉心構思。他指出:「設計以劇情行先嘅動作其實仲難過純動作打打殺殺,但其實唔需要好宏偉嘅鏡頭先令觀眾刻骨銘心,我有啲另類方法令一支鉛筆都好有力。」錢嘉樂設計的動作鏡頭,注重氣氛且合情合理,他表示:「太血腥反而過火,只要到位就停,咁先過癮。」

圖:出席香港動作特技演員公會春茗晚宴

培育本地特技演員

擔任香港動作特技演員公會會長的錢嘉樂,眼見近年電影製作北移,擔心影響本地武行生計,故這十年以來,他仍堅守在香港拍攝本地時裝動作警匪片,提供工作機會予業界。同時,他留意到武行年紀一般較大,故亦著力培育年輕新人加入行業。他指出:「舊年籌備咗今屆嘅動作演員訓練班,有15個人畢業,呢班就係我哋嘅新血同希望。」他期望,業內動作指導也能夠起用更多本地武行,承傳這份香港精神。

採訪.文/嚴凱瑩

編輯/張唯

攝影/曾潤培

關注我們Facebook專頁