【再合作冇問題】鄧萃雯自組工作室 王祖藍:我係有不足嘅地方
2017年10月20日07:00

鄧萃雯日前已經離開咗王祖藍嘅經理人公司,仲決定自組工作室。雯女呢日喺灣仔出席一個活動時話,自己已經管理自己好多年,目前最緊要係有一個得力助手,幫佢實踐計劃。

提到佢同祖藍嘅合作,佢話當初祖藍已經同佢講,幫佢唔係一份筍工:「呢個階段我唔係要紅,亦唔係要賺好多錢,希望做得有意思,做啲有影響力嘅演藝工作。」

雯女仲話,之後兩人如果有機會合作都冇問題:「我可以話係第一個同佢合作嘅藝人,當時佢叫我試下先,試試下試咗一年到依家。」

至於祖藍,呢日帶埋《老表,畢業喇!》嘅演員宣傳,提到旗下藝人流失嘅問題,佢話:「我自己係有不足嘅地方,真係太忙,不過公司有其他同事幫手。」又話未來會搵內地新人加入公司。

講到有傳徐子珊亦有意離開,王祖藍就話對方冇去意,之後仲會一齊返內地拍攝節目。

王祖藍又澄清令太太李亞男從來都冇抑鬱症:「之前係畀人誤解,如果老婆有病,我諗香港有好多人都有病!」

關注我們Facebook專頁
    相關新聞
      更多瀏覽