克勤扮空中飛人 玩命開騷
2017年09月05日03:00
潮流興着睡衣當時裝,克勤也不例外。

【星島日報報道】《李克勤慶祝成立三十周年演唱會》前晚在紅館揭幕,克勤的父母、老婆盧淑儀、老闆楊受成和太太及蔡志明夫婦等捧場客眾多;還有譚詠麟、劉德華、郭富城、謝霆鋒、蔡卓妍及鍾欣潼等拍片打氣,阿倫更爆克勤是「過分嚴重尊重老婆協會」會長,沒料到這位會長竟斗膽當着老婆面前公然攬女,膽子變大了的克勤更連環大玩驚險高難度演出長達15分鐘!

克勤甫出場即挑戰高難度,大跳《舊歡如夢》新版舞,再變身空中飛人被威吔吊高、在爆破煙花中凌空360度自轉10次,又於45度的斜台離地狂奔,玩足15分鐘後,全身滴汗的克勤也自嘲似跌了落泳池;其後還站在僅容一個人身位的20呎高圓柱高台上演唱,更有一幕被升降台彈出的型格登場位。原來不止表演驚險,克勤透露擁有過百場演唱會經驗的他首度遇上舞台搭建延誤,及至前日下午才完成,首次沒試過總綵排就演出。

當晚,克勤以8個不同造型示人,換上全紅裝束時,迎來粉藍假髮、全藍打扮的表演嘉賓鄭秀文(Sammi),兩人擁抱後就隨即鬥嘴。 Sammi作狀投訴說:「你搵人做嘉賓都好Q麻煩,連嘉賓着甚麼衫都要管,只准着一種色,我想過着黃色,但唔想成條蕉咁升上來,又唔想綠色成棵菜,原本有套紅色衫都好靚,但無理由同你做兩個利是封,又唔係過年騷,最後決定粉藍色變成支波子汽水咁,連底橫都係粉藍色,你話要由頭到尾都係一種色嘛!」熒光幕又播出了兩人於1991年合作《浪族闊少爺》的劇照,其中還有咀嘴相。Sammi再投訴克勤指:「這是我拍的第一部電視劇,應該無30年,但好尷尬呀,你的演唱會講明30年,同得你做friend好容易出賣年齡,究竟你幾多歲?」克勤即還擊:「五張爭少少,男人到五張先有男人味,同你那位(許志安)差唔多;你最近都經常和我太太在社交平台聯絡,搞笑係你每次開演唱會她都大肚睇唔到,所以你再開演唱會就講聲,我就要準備一下。」Sammi笑窒克勤:「得唔得呀你?話晒五張,操下先啦咁瘦,哈哈!娛樂圈最珍貴是大家互相支持幫助的精神,之前我在紅館開騷失聲,克勤第一時間短訊問要不要幫忙,今次克勤沒有綵排直接開騷,我知道克勤好擔心亦有短訊問候。」說罷,兩人又再擁抱。

受訪時,克勤被取笑身為會長也敢當老婆面攬Sammi,及播出兩人的親吻照,克勤笑謂:「我都唔知會播,不過太太剛剛有攬着我說good show,咁樣應該無事;其實太太看到我半空狂轉圈,都有黑面問是否真的要做,提我小心。被吊到咁高,感覺又幾爽,但事實上前一晚做唔到總綵排,我等到凌晨5點返到酒店,都擔心到瞓唔到,可能瞓得少有影響,一度有少少聲沙,又一度抽筋,可能開騷前太過搏命排練,加上今次的舞台機關特別多,這方面亦要多謝公司愛錫肯花錢,總之完成首場真係呼一口氣、大步檻過。」提到多款造型但沒有晒肌,他搞笑指知道不用露後,一個星期無健身,胸也細了變回32A。

關注我們Facebook專頁
    相關新聞
      更多瀏覽