【因父債受要脅】陸永老婆發聲明:保留追究權利
2017年08月19日07:00

陸永太太Reina(陳莉娜)自細同生父關係疏離,最近仲無啦啦係網上大吐苦水,例如話:「當我羨慕人哋有個好老豆嘅時候,陸生會提醒我,我有一個好好嘅老公!」、「搞到我仔女無所謂,唔好俾我條女知就得!有幾多個父親講得出呢句說話!?」等,好多人都問佢咩事,但佢就冇乜點提。

直到呢日佢喺ig發聲明,同父親劃清界線:「本人陳莉娜特此聲明,有關陳_生或_ _材料工程有限公司對外之一切行為及/或金錢糾紛,一槪與本人無關。此外,若任何人就上述之事宜,或因本人丈夫之身份,而向本人作出任何要脅、騷擾或纏擾之行為,本人必將報警處理。同時,本人亦保留一切法律追究權利。」

陸永喺丹麥拍緊嘢,佢用短訊回覆傳媒時話,聲明裡面嗰個陳生係Reina生父:「細個嗰陣,佢爸爸媽媽離咗婚,大家一年只係見一兩次面。直到舊年太太同朋友夾份開美容院,佢呢位爸爸做裝修,所以搵佢幫手,點知做完晒,開始營業時就好多人上門收裝修錢。」

陸永話裝修費用一早已付清畀外父,但就唔知點解仲有人上門追數,搞到太太驚到退股,但最近同樣嘅事又發生:「最近又有啲唔知乜嘢數,又有人滋擾美容院,不停打電話去騷擾,又要搵我太太,甚至搵埋我出嚟,呢啲始終係陳生自己嘅私人事務,我哋亦都再幫唔到陳生!」

陸永話以前都試過借錢畀外父周轉,金額都唔細,但原來外父仲爭人好多錢,但佢哋真係幫唔到手,加上呢啲債已經嚴重影響家人精神同日常生活,所以先出聲明。

關注我們Facebook專頁
    相關新聞
      更多瀏覽