【發哥62歲生日】發嫂搞驚喜生日P 究竟有乜食?
2017年05月19日07:00

星期四喺發哥周潤發62歲正日生日,呢日佢依然要開工,為電影《無雙》趕戲!不過發嫂陳薈蓮一早已經準備好,為發哥搞咗個驚喜生日P!

當放午飯時,發哥見到廠外已預備咗多個蛋糕幫佢慶生,而且有份合作嘅郭富城更代表劇組向發哥送上生日卡,又領唱生日歌祝賀,成個小粉絲咁!

發哥接受訪問時話好開心:「開心到不得了,發嫂問我今晚想食咩,我話求其,點知佢整咗咁大壇嘢,好感動!」又話:「好耐冇喺片場過生日,生日對我嚟講好平常!」

至於呢個驚喜生日P有咩食呢?原來發嫂揀咗銀杏館嘅到會,發嫂話揀呢個機構好有意義,事關發哥好關心長者,而銀杏館主廚就話,呢日提供咗香草紅酒牛肋骨、焗田螺薯蓉等10多款菜式!

而且,發哥一向對劇組飲食照顧周到,佢見有時拍戲去到荒山野嶺,未必咁易「搵食」,所以佢每次都自掏腰包,整咗個「發記士多」,搵阿姐喺片場提供食物,而且係即叫即整,而呢日,「發記士多」就提供合掌瓜湯、韮菜花炒豬肉等為發哥慶生!

關注我們Facebook專頁