【藍橘子】《外國人覺得香港人 飲食文化 低一等?》
2017年04月21日21:47

【藍橘子】《外國人覺得香港人飲食文化低一等?》

text-藍橘子|Photo-電影截圖﹑Youtube截圖﹑電視劇劇照|文章來源:新monday

內容由博客提供及授權轉載,不代表本刊立場

最近同一位外國朋友傾計,佢喺英國一間餐廳做侍應,由於餐廳位置屬於旅遊區,所以經常都會招

呼到唔同國家嘅遊客。

而佢覺得好多亞洲人嘅 飲食文化 都非常奇怪,嚴重啲講,直頭侮辱咗被殺死嘅豬牛羊!

我笑笑口問有冇咁誇張,外國朋友逐一向我舉例。

例如,好多亞洲遊客入到嚟餐廳,只顧住叫嘢食,完全唔會叫嘢飲。

外國朋友指住我話,香港人尤其嚴重。本來以為香港人食飯唔習慣飲酒,但我哋連水都唔會叫,全

程得個食字,一滴水都唔飲好奇怪。

我向呢位外國朋友解釋,其實我作為一個旅遊Cheap精,去到外國嘅餐廳,除非好渴先會叫杯可樂,否則都唔會叫水,點解呢?!

因為佢連水都要畀錢啊大佬!

食飯前例牌奉上嘅麵包已經要收錢,不過唔緊要,香港人習慣食住先。

但支水就一定唔能夠妥協!

香港好多餐廳飲水都唔使錢,韓國餐廳仲成支擺喺枱面任飲。

一下子要畀幾蚊美金去買支水,心底裡覺得好唔值。

呢個亦係香港人嘅核心精神。一次免費,一輩子都要免費。

更重要嘅係,我真心覺得外國有汽嘅水好難飲…

外國朋友唔服氣,又舉多個例。

外國餐廳都會分開頭盤、前菜、主菜、甜品…但大部分華人都唔會識得分,一係叫幾個主菜Share,

一係就叫一個頭盤沙拉,幾個前菜,然後直接食甜品,完全唔跟次序。

仲有,亞洲人好鍾意成枱擺滿食物,唔係逐道菜上…

咁樣亂咁食法,完全唔識享受成個晚餐。

呢個同樣係文化問題,首先香港乜都講求效率,逐道菜上實在唔合乎經濟原則。由細到大我哋去酒

樓,都係叫到成枱嘢食。

香港人最鍾意嘅打邊爐,唔通食完成碟肥牛先嚟碟雞子咩?雞子點一次過啪晒成碟啊大佬?!

我相信絕大部分情侶去到一間餐廳,都會叫兩個唔同菜式再Share食。

大家都可以試到唔同嘅食物,何樂而不為?

其實唔單止飲食,各種生活文化都係一樣。

每個國家都有佢獨特嘅生活習慣,簡單一個例子,香港人就算去到外地,寧願買枝裝水,都唔敢扭

開水喉直接飲水。

就算明知過濾過,心裡都硬係唔舒服。因為由細到大,周圍嘅生活習慣已經根深柢固。

嗰種去一年Working Holiday就滿口英文,話自己已經改唔同口,又要每餐食沙津嘅偽ABC。其實心

底裡只係覺得外國比較高尚,返到香港繼續以外國方式生活,咁先夠型格。

但其實,我覺得就算去到外國旅行,只要唔影響到其他人,繼續依照自己以往嘅生活方式無乜唔妥

。無必要扁低自己文化,去抬高別人。

外國嘅屎唔會特別香,就算你滿口英文,屎都係一樣咁臭。

相關文章:

元朗 掃食4間小店! M&M’s芝士雞蛋仔+即焗燶邊叉燒蛋飯|掃街王|

ICAC 開放日!約朋友上去飲杯「廉署咖啡」

15款超巿熱門 午餐肉比拼 ! 白豬仔、梅林牌有對手!|Food Battle|

關注我們Facebook專頁
    相關新聞
      更多瀏覽